ທ່ານນາຍົກລັດຖະມົນຕີ ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ເມືອງ ຫາດຊາຍຟອງ

ຜູ້ຂຽນ: ພາບ ແລະ ຂ່າວໂດຍ: ທ່ານ ອານຸພາບ ອານຸລັກ

ວັນພຸດ, 13 ສ.ຫ 2014 12:00

​​​​​​​​

ໃນຕອນເຊົ້າວັນທີ 12 ສິງຫາ 2014. ທ່ານ ທອງສິງ ທຳມະວົງ, ນາຍົກລັດຖະມົນຕີ, ພ້ອມດ້ວຍຄະນະ ແລະ ພາກສ່ວນທີ່ກ່ຽວຂ້ອງ ໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ເມືອງ ຫາດຊາຍຟອງ, ນະຄອນຫຼວງວຽງຈັນ ຊຶ່ງໄດ້ຮັບການຕ້ອນຮັບຈາກທ່ານເຈົ້າເມືອງໆຫາດຊາຍຟອງ ພ້ອມດ້ວຍຄະນະພັກຄະນະນຳ, ອຳນາດການປົກຄອງເມືອງ ແລະ ພໍ່ແມ່ປະຊາຊົນພາຍໃນ ເມືອງຫາດຊາຍຟອງ ໃຫ້ການຕ້ອນຮັບ ຢ່າງອົບອຸ່ນ. 
 
ທ່ານ ນາຍົກລັດຖະມົນຕີໄດ້ຮັບຟັງ ການລາຍງານໂດຍຫຍໍ້ ກ່ຽວກັບສະພາບການພັດທະນາ ເສດຖະກິດ-ສັງຄົມ 6 ເດືອນຕົ້ນປີ 2013-2014 ແລະ ທ່າແຮງບົ່ມຊ້ອນ ຂອງເມືອງ ໃນໄລຍະຜ່ານມາ, ໃນໂອກາດນີ້ ທ່ານ ທອງສິງ ທຳມະວົງ ໄດ້ໃຫ້ກຽດໂອ້ລົມ ໂດຍໄດ້ສະແດງຄວາມຍ້ອງຍໍ ຊົມເຊີຍ ຕໍ່ຜົນງານທີ່ຍາດມາໄດ້ ໃນໄລຍະຜ່ານມາ.  ພ້ອມທັງໄດ້ຊີ້ນໍາ ໃຫ້ຄະນະພັກ, ອຳນາດການປົກຄອງ ໃນແຕ່ລະຂັ້ນ ເອົາໃຈໃສ່ແກ້ໄຂ ປະກົດການຫຍໍ້ທໍ້ໃນສັງຄົມ ໃຫ້ຫຼຸດລົງ; ນຳໃຊ້ທ່າແຮງບົ່ມຊ້ອນ ຂອງເມືອງໃຫ້ປະສິດທິພາບ ແລະ ປະສິດທິຜົນສູງ, ສຶກສາອົບຮົມໃຫ້ຊາວໜຸ່ມ ມີຄວາມດຸໝັ່ນ ຂະຫຍັນພຽນ ກ້າຄິດກ້າຕັດສິນໃຈດ້ວຍຕົນເອງ, ສ້າງວຽກເຮັດງານທຳ  ເພື່ອຫຼຸດຜ່ອນ ການໄປອອກແຮງງານຢູ່ຕ່າງປະເທດ;   ປຸກລະດົມ ແລະ ຊຸກຍູ້ປະຊາຊົນ ທຳການຜະລິດກະສິກຳ ແບບທັນສະໄໝ ເພື່ອເພີ່ມສະມັດຕະພາບ ການຜະລິດ ໃຫ້ສູງ ແລະ ເພີ່ມການຜະລິດເປັນສິນຄ້າໃຫ້ຫຼາຍຂຶ້ນ ແນໃສ່ ແກ້ໄຂຊີວິດການເປັນຢູ່ ຂອງປະຊາຊົນ ໃຫ້ດີຂື້ນເທື່ອລະກ້າວ; ຄຽງຄູ່ກັນນີ້ ກໍຕ້ອງອອກແຮງ ປຸກລະດົມບັນດາບໍລິສັດ, ຫົວໜ່ວຍທຸລະກິດ, ຫ້າງຮ້ານ ແລະ ບຸກຄົນ ປະຕິບັດພັນທະເຂົ້າງົບປະມານ ເພື່ອໃຫ້ມີງົບປະມານພຽງພໍ ສຳລັບພັດທະນາເມືອງ ໃຫ້ກາຍເປັນເມືອງທີ່ ເຂັ້ມແຂງຮອບດ້ານ. ພ້ອມນັ້ນ, ທ່ານຍັງໄດ້ເນັ້ນໜັກໃຫ້ຄະນະພັກເມືອງ ສຸມໃສ່ສ້າງຂະບວນການ ຕາມເນື້ອໃນຄຳຂວັນ ຮັກຊາດພັດທະນາ ໃຫ້ເປັນອັນ ລະອຽດ ແລະ ມອບໝາຍແຕ່ລະບ້ານ ນຳໄປຈັດຕັ້ງປະຕິບັດ ຜັນຂະຫຍາຍ ຄຳຂວັນດັ່ງກ່າວ ໃຫ້ປະກົດຜົນເປັນຈິງ.
 
​​​ນອກນັ້ນ,   ທ່ານນາຍົກລັດຖະມົນຕີ ພ້ອມດ້ວຍຄະນະ ຍັງໄດ້ລົງເຄື່ອນໄຫວຕິດຕາມກວດກາ ສະພາບຕາຝັ່ງເຈື່ອນຢູ່ບໍລິເວນເຂດກໍ່ສ້າງສະຖານີດາວທຽມ ຢູ່ເຂດບ້ານນາໄຮ່ ແລະ ຕິດຕາມ ຊຸກຍູ້ການຜະລິດ ຢູ່ບໍລິສັດ ພັນເພັດ ພັດທະນາກະສິກຳ ຈຳກັດຜູ້ດຽວ ຢູ່ເຂດບ້ານໜອງແຫ້ວ ຂອງເມືອງດັ່ງກ່າວ.​​

ແຫຼ່ງ: ຫ້ອງວ່າການລັດຖະບານ
ຂ່າວອື່ນໆ