ພິທີສະເຫຼີມສະຫຼອງວັນສ້າງຕັ້ງແຂວງວຽງຈັນ ຄົບຮອບ 40 ປີ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນອັງຄານ, 14 ທ.ວ 2021 15:00

​​​            <div style=

​​​ໃນຕອນເຊົ້າຂອງວັນທີ 13 ທັນວາ 2021 ທີ່ສະໂມສອນຂອງແຂວງວຽງຈັນ ໄດ້ຈັດຕັ້ງພິທີສະເຫຼີມສະຫຼອງ ວັນສ້າງຕັ້ງແຂວງວຽງຈັນ ຄົບຮອບ 40 ປີ (13/8/1981-13/8/2021) ຂຶ້ນ, ໂດຍການໃຫ້ກຽດເຂົ້າຮ່ວມຂອງ ທ່ານ ກິແກ້ວ ໄຂຄໍາພິທູນ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ຜູ້ຊີ້ນໍາວຽກງານຂົງເຂດການປົກຄອງ ແລະ ວັດທະນະທໍາ-ສັງຄົມ; ມີທ່ານ ຄໍາພັນ ສິດທິດໍາພາ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ, ພ້ອມດ້ວຍ ບັນດາທ່ານອະດີດການນໍາແຂວງ, ພະນັກງານບຳນານ, ແລະ ຄະນະນຳແຂວງວຽງຈັນ ເຂົ້າຮ່ວມ.
​ໃນພິທີ, ທ່ານ ຄໍາພັນ ສິດທິດໍາພາ ໄດ້ຂຶ້ນປາໄສ ວ່າ: ການຈັດພິທີຄັ້ງນີ້ ແມ່ນເພື່ອເປັນການອອກແຮງແຂ່ງຂັນສ້າງຜົນງານ, ສ້າງຂະບວນການຂ່ຳນັບຮັບຕ້ອນວັນສ້າງຕັ້ງແຂວງວຽງຈັນ ຄົບຮອບ 40 ປີ ແລະ ພ້ອມກັນສຸມໃສ່ຈັດຕັ້ງປະຕິບັດມະຕິກອງປະຊຸມໃຫຍ່ອົງຄະນະພັກແຂວງ ຄັ້ງທີ VI ແລະ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງລັດ 5 ປີ ຄັ້ງທີ IX ຕິດພັນກັບການສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 46 ປີ, ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 101 ປີ ແລະ ຊົມເຊີຍຜົນສໍາເລັດການກໍ່ສ້າງ ແລະ ເປີດການນໍາໃຊ້ເສັ້ນທາງລົດໄຟ ລາວ-ຈີນ. ພິທີໃນມື້ນີ້, ເຕັມໄປດ້ວຍຄວາມເບີກບານມ່ວນຊື່ນ, ເອກອ້າງທະນົງໃຈ ຕໍ່ຜົນສໍາເລັດອັນໃຫຍ່ຫຼວງທີ່ທົ່ວພັກ, ທົ່ວກອງທັບ ແລະ ປະຊາຊົນບັນດາເຜົ່າ ເວົ້າລວມ, ເວົ້າສະເພາະ ປະຊາຊົນແຂວງວຽງຈັນ ທີ່ສາມາດຍາດມາໄດ້ຜົນສໍາເລັດໃນໄລຍະຜ່ານມາ ທັງເປັນການສະແດງເຖິງຄວາມອາໄລຮັກຢ່າງສຸດຊຶ້ງ ເຖິງປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກ ວິລະບູລຸດແຫ່ງຍຸກສະໄໝຂອງຊາດລາວເຮົາ, ລູກຜູ້ປະເສີດຂອງປະຊາຊົນລາວ ຜູ້ພິລະອາດຫານ ແລະ ສະແດງຄວາມຮູ້ບຸນຄຸນໃຫຍ່ຫຼວງ ແລະ ອາໄລອາວອນ ຢ່າງສຸດຊຶ້ງ ເຖິງບັນດາສະຫາຍອະດີດການນໍາຂອງພັກ-ລັດ, ອະດີດການນຳຂອງແຂວງວຽງຈັນ, ບັນດາສະຫາຍສະມາຊິກພັກ, ພະນັກງານ, ນັກຮົບປະຕິວັດ, ປະຊາຊົນບັນດາເຜົ່າ ທີ່ໄດ້ເສຍສະຫຼະຊີວິດ ເພື່ອພາລະກິດປະຕິວັດ, ເພື່ອຄວາມຈະເລີນຮຸ່ງເຮືອງຂອງປະເທດຊາດ, ຄວາມຢູ່ເຢັນຜາສຸກຂອງພວກເຮົາ ກໍຄືຂອງປະຊາຊົນບັນດາເຜົ່າໂດຍສະເພາະ ກໍຄື ແຂວງວຽງຈັນ ຈົນມາຮອດທຸກວັນນີ້.
            
​ໂອກາດດັ່ງກ່າວ, ທ່ານ ກິແກ້ວ ໄຂຄໍາພິທູນ ໄດ້ຕາງໜ້າໃຫ້ກົມການເມືອງສູນກາງພັກ ປະດັບຫຼຽນໄຊອິດສະ ຫຼະ ຊັ້ນ I ໃຫ້ແຂວງວຽງຈັນ ແລະ ມີບັນດາການນໍາຂອງແຂວງວຽງຈັນ ຂຶ້ນຮັບ; ພ້ອມນີ້, ໃນພິທີຍັງໄດ້ມີການປະດັບຫຼຽນໄຊແຮງງານ ຊັ້ນ II ໃຫ້ ບໍລິສັດ ມາລີນີ ຈຳກັດ ທີ່ມີຜົນງານດີເດັ່ນໃນການລົງທຶນກໍ່ສ້າງຂົວຂ້າມນໍ້າງື່ມ ຢູ່ເຂດເມືອງເກົ່າ-ບ້ານປາກກະຍຸງ ເມືອງວຽງຄຳ ແຂວງວຽງຈັນ; ປະດັບຫຼຽນໄຊແຮງງານ ຊັ້ນ III ຈຳນວນ 2 ຫຼຽນ ໃຫ້ 2 ທ່ານ ທີ່ມີຜົນງານດີເດັ່ນ; ມອບໃບຢັ້ງຢືນຜົນງານ ໃຫ້ອະດີດການນໍາແຂວງວຽງຈັນ 6 ທ່ານ ທີ່ມີຜົນງານດີເດັ່ນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືແຂວງວຽງຈັນ ໃຫ້ມີຄວາມຈະເລີນຮຸ່ງເຮືອງຂຶ້ນເລື້ອຍໆ ແລະ ມອບໃບຈາລຶກຜົນງານໃຫ້ບັນດາການນຳຮຸ່ນກ່ອນ. 
                                            
​ໃນຕອນບ່າຍຂອງວັນດຽວກັນ, ທ່ານ ກິແກ້ວ ໄຂຄໍາພິທູນ ໄດ້ເດີນທາງໄປຢ້ຽມໂຮງໝໍແຂວງວຽງຈັນ ພ້ອມທັງ ມອບອຸປະກອນໃນການປ້ອງກັນໂຄວິດ-19 ໃຫ້ພະນັກງານແພດໝໍທີ່ປະຕິບັດໜ້າທີ່ ປ້ອງກັນ, ປິ່ນປົວຜູ່ທີ່ຕິດໂຄວິດ-19 ເປັນຕົ້ນ ນໍ້າຢາລ້າງມື, ຜ້າອັດປາກ-ດັງ ແລະ ມອບເງິນຊ່ວຍເຫຼືອໃຫ້ໂຮງໝໍແຂວງວຽງຈັນ ຈໍານວນ 10 ລ້ານກີບ ເພື່ອປະກອບສ່ວນໃນການຈັດຕັ້ງປະຕິບັດວຽກງານດັ່ງກ່າວ, ຈາກນັ້ນ, ທ່ານ ກິແກ້ວ ໄຂຄໍາພິທູນ ກໍ່ໄດ້ໄປຢ້ຽມຢາມໂຄງການພັດທະນາເຂດທ່ອງທ່ຽວ ຢູ່ໜ້າເຂື່ອນໄຟຟ້ານໍ້າງື່ມ 1, ເມືອງແກ້ວອຸດົມ ເຊິ່ງເປັນໂຄງການຊ່ວຍເຫຼືອຂອງທະນາຄານພັດທະນາອາຊີ ADB ຕື່ມອີກ. 


ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ