ເປີດນຳໃຊ້ທາງລົດໄຟ ລາວ-ຈີນ ຢ່າງເປັນທາງການ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນສຸກ, 03 ທ.ວ 2021 19:00

​​​​​​​​ພິທີເປີດນຳໃຊ້ທາງລົດໄຟ ລາວ-ຈີນ ໄດ້ດຳເນີນຢ່າງເປັນທາງການ ໃນວັນທີ 03 ທັນວາ 2021 ຊຶ່ງພິທີທາງການ ໄດ້ຈັດຢູ່ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ, ພາຍໄຕ້ການການເປັນປະທານຮ່ວມຂອງ ສະຫາຍ ທອງລຸນ ສີສຸລິດ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ແລະ  ສະຫາຍ ສີ ຈີ້ນຜິງ, ເລຂາທິການໃຫຍ່ພັກກອມມູນິດຈີນ, ປະທານປະເທດ ແຫ່ງ ສປ ຈີນ ຜ່ານລະບົບທາງໄກ​. ຫຼັງຈາກນັ້ນ ການນຳພັກ-ລັດ ແຫ່ງ ສປປ ລາວ ນຳພາໂດຍ ທ່ານ ພັນຄຳ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ ໄດ້ຂີ່ລົດໄຟລາວ ຖ້ຽວປະຖົມມະເລີກ ອອກຈາກສະຖານີນະຄອນ ຫຼວງວຽງຈັນ ເພື່ອຢ້ຽມຊົມສະຖານີວັງວຽງ ແຂວງວຽງຈັນ ແລະ ຂະບວນຂົນສົ່ງສິນຄ້າຮອບປະຖົມມະເລີກ ຈາກສະຖານີນະຄອນຫຼວງວຽງຈັນ ໄປສະຖານີນະຄອນຄຸນໝິງ ສປ ຈີນ ຊຶ່ງເປັນເວລາດຽວກັນກັບ ຂະບວນລົດໄຟຜູ້ໂດຍສານ ແລະ ຂະບວນຂົນສົ່ງ ກໍອອກຈາກສະຖານີນະຄອນຄຸນໝິງ ໄປສະຖານີນະຄອນຫຼວງວຽງຈັນ.

​​​​​​​ໃນໂອກາດກ່າວເປີດພິທີທາງການ, ສະຫາຍເລຂາທິການໃຫຍ່, ປະທານປະເທດແຫ່ງ ສປປ ລາວ ໄດ້ກ່າວວ່າ: ພິທີໃນມື້ນີ້ ເປັນພິທີອັນມີຄວາມໝາຍຄວາມສຳຄັນ ທາງປະຫວັດສາດ ທີ່ເປັນການສ້າງສັກກະລາດໃໝ່ ແຫ່ງການພັດທະນາໂຄງລ່າງພື້ນຖານ ທີ່ທັນສະໄໝ ຂອງ ສປປ ລາວ, ເປັນຄວາມເອກອ້າງທະນົງ ໃຈ ທີ່ເຮັດໃຫ້ຄວາມຝັນ ແລະ ຄວາມຄອງຄອຍ ຂອງປະຊາຊົນລາວ ປະກົດຜົນເປັນຈິງ. ໂຄງການນີ້ ຍັງເປັນສັນຍາລັກທາງປະຫວັດສາດ ທີ່ສຳຄັນໃຫ້ແກ່ສາຍພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ. ສປປ ລາວ ໃຫ້ການສະໜັບສະໜູນ ຢ່າງສະເໝີຕົ້ນສະເໝີປາຍ ແລະ ຕັ້ງໜ້າເຂົ້າຮ່ວມຜັນຂະຫຍາຍ ຂໍ້ຄິດລິເລີ່ມ “ໜຶ່ງແລວ ໜຶ່ງເສັ້ນທາງ ” ຂອງ ສະຫາຍ ສີ ຈີ້ນຜິງ ແລະ ສປປ ລາວ ກໍ່ເປັນຜູ້ໄດ້ຮັບຜົນປະໂຫຍດໂດຍກົງ ຈາກນະໂຍບາຍ ແລະ ຂໍ້ລິເລີ່ມນີ້ຢ່າງແທ້ຈິງ. ໂຄງການທາງລົດໄຟ ລາວ-ຈີນ ເປັນໂຄງການຮ່ວມມືທາງດ້ານຍຸດທະສາດ ທີ່ສໍາຄັນ ໃນການພັດທະນາ ຂອງສອງປະເທດ ແລະ ເປັນກຳລັງແຮງໃຫ້ ສປປ ລາວ ໃນການປະຕິບັດຍຸດທະສາດ “ ຫັນປະເທດທີ່ບໍ່ມີຊາຍແດນຕິດກັບທະເລ ໄປສູ່ການເປັນປະເທດເຊື່ອມໂຍງ ເຊື່ອມຈອດໃນພາກພື້ນ” ໃຫ້ເປັນຮູບປະທຳ. ໂຄງການທາງລົດໄຟ ລາວ-ຈີນ ເປັນຂອງຂວັນອັນລ້ຳຄ່າ ໃຫ້ແກ່ປະຊາຊົນລາວ ໃນໂອກາດສະເຫຼີມສະຫຼອງ ວັນສະຖາປະນາ ສປປ ລາວ ຄົບຮອບ 46 ປີ; ປະກອບສ່ວນເຂົ້າໃນການສະເຫຼີມສະຫຼອງ ຄົບຮອບ 60 ປີ ຂອງການສ້າງຕັ້ງສາຍພົວພັນການທູດ ລາວ-ຈີນ ຢ່າງມີຄວາມໝາຍເລິກເຊິ່ງ. ໝາກຜົນຂອງຄວາມສຳເລັດເຫຼົ່ານີ້, ລ້ວນແຕ່ສະແດງໃຫ້ເຫັນເຖິງ ຈິດໃຈການເປັນຄູ່ຮ່ວມມືຍຸດທະສາດຮອບດ້ານໝັ້ນຄົງ ຍາວນານ ຕາມທິດ 4 ດີ ແລະ ເປັນສັນຍາລັກອັນສຳຄັນ ໃນຂະບວນການສ້າງຄູ່ຮ່ວມຊາຕາກຳ ລາວ-ຈີນ, ຈີນ-ລາວ ທີ່ນຳເອົາຜົນປະໂຫຍດຢ່າງແທ້ຈິງ ມາສູ່ປະຊາຊົນ ທັງສອງຊາດ ລາວ-ຈີນ ພວກເຮົາ.

​​​​​​​​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ