ທ່ານຮອງນາຍົກລັດຖະມົນຕີ ຕ້ອນຮັບຜູ້ຕາງໜ້າອົງການຢູນີເຊບ ປະຈຳ ສປປ ລາວ

ຜູ້ຂຽນ: ກົມປະຊາສຳພັນ, ພະແນກໂຄສະນາ

ວັນພຸດ, 08 ກ.ຍ 2021 12:00

​​​​​​ໃນຕອນເຊົ້າວັນທີ 8 ກັນຍາ 2021 ທີ່ສໍານັກງານນາຍົກລັດຖະມົນຕີ, ທ່ານ ກິແກ້ວ ໄຂຄໍາພິທູນ, ຮອງນາຍົກ ລັດຖະມົນຕີ ໄດ້ໃຫ້ກຽດຕ້ອນຮັບ ການຢ້ຽມຂໍ່ານັບຂອງທ່ານ ດຣ. ນາງ ເພຍ ເຣເບນໂຣ ບຣິໂຕ, ຜູ້ຕາງໜ້າອົງການ ຢູນີເຊບ ປະຈຳ ສປປ ລາວ, ມີທ່ານຮອງລັດຖະມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ພ້ອມດ້ວຍ ຫົວໜ້າກົມ, ຮອງຫົວໜ້າກົມ ຈາກກະຊວງສຶກສາທິການ ແລະ ກິລາ, ກະຊວງແຜນການ ແລະ ການລົງທຶນ, ກະຊວງສາທາລະນະສຸກ ແລະ ຫ້ອງວ່າການສຳນັກງານນາຍົກລັດຖະມົນຕີ ແລະ ພະນັກງານກ່ຽວຂ້ອງ ເຂົ້າຮ່ວມ.
​​​ໃນໂອກາດນີ້, ທ່ານ ຮອງນາຍົກລັດຖະມົນຕີ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການຊ່ວຍ ເຫຼືອຂອງອົງການຢູນີເຊບ ຕໍ່ ສປປ ລາວ ໃນໄລຍະຜ່ານມາ, ພ້ອມທັງ ຢືນຢັນວ່າ ຈະສືບຕໍ່ຊຸກຍູ້ສົ່ງເສີມ ພາກສ່ວນກ່ຽວຂ້ອງ ຂອງ ສປປ ລາວ ອຳນວຍຄວາມສະດວກ ແລະ ພົວພັນຮ່ວມມືກັບອົງການຢູນີເຊັບ ຢ່າງສຸດຄວາມສາມາດຂອງຕົນ ເພື່ອຈັດຕັ້ງປະຕິບັດວຽກງານ ກໍ່ຄືແຜນງານຮ່ວມມື ແລະ ໂຄງການຕ່າງໆ ໃຫ້ມີຜົນສຳເລັດ ຕາມຄາດໝາຍທີ່ກຳນົດໄວ້ ໃນແຕ່ລະໄລຍະ; ສະເໜີ ອົງການຢູນີເຊັບ ສືບຕໍ່ເສີມຂະຫຍາຍບົດຮຽນອັນດີເດັ່ນ ແລະ ມູນເຊື້ອອັນດີງາມ ໃນການພົວພັນຮ່ວມມື ລະຫວ່າງ ອົງການຢູນີເຊັບ ກັບ ສປປ ລາວ ເພື່ອເປັນພື້ນຖານ ໃຫ້ແກ່ການສືບຕໍ່ພົວພັນຮ່ວມມື ແລະ ຈັດຕັ້ງປະຕິບັດວຽກງານຕ່າງໆ ໃນຕໍ່ໜ້າ ໃຫ້ໄດ້ຮັບປະສິດທິພາບ ແລະ ປະສິດທິຜົນ ດີຂຶ້ນກວ່າເກົ່າ. ນອກຈາກນັ້ນ ທ່ານຍັງໄດ້ແຈ້ງໃຫ້ຜູ້ຕາງໜ້າອົງການຢູນີເຊັບ ປະຈຳ ສປປ ລາວ ຊາບ ກ່ຽວກັບສະພາບການແຜ່ລະບາດ ຂອງພະຍາດໂຄວິດ-19 ຢູ່ ສປປ ລາວ, ລວມທັງການຊີ້ນໍາບັນຊາ ແລະ ການຈັດຕັ້ງປະຕິບັດມາດຕະການປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດດັ່ງກ່າວ ຂອງລັດຖະບານ ກໍ່ຄືຂອງຄະນະສະເພາະກິດ ແລະ ອົງການປົກຄອງທ້ອງຖິ່ນຂັ້ນຕ່າງໆ, ຕະຫຼອດຮອດ ການຊ່ວຍເຫຼືອຂອງປະເທດເພື່ອນມິດ, ອົງການຈັດຕັ້ງສາກົນ, ການມີສ່ວນຮ່ວມ ຂອງສັງຄົມ ເພື່ອບັນລຸຄາດໝາຍໃນການເຮັດໃຫ້ມີຜູ້ຕິດເຊື້ອພະຍາດໂຄວິດ-19 ໜ້ອຍທີ່ສຸດ, ໃຫ້ມີຜູ້ເສຍຊີວິດໜ້ອຍທີ່ສຸດ ແລະ ໃຫ້ສັງຄົມ ໄດ້ຫັນໄປສູ່ການດຳລົງຊີວິດປົກກະຕິ ພາຍໃຕ້ເງື່ອນໄຂວິຖີຊີວິດປົກກະຕິໃໝ່ໄດ້ໄວ ແລະ ທົ່ວເຖິງ.
​​​ໃນໂອກາດດຽວກັນ, ທ່ານ ຜູ້ຕາງໜ້າອົງການຢູນິເຊບ ປະຈໍາ ສປປ ລາວ ໄດ້ສະແດງຄວາມຂອບໃຈ ຕໍ່ການຕ້ອນຮັບ ແລະ ຊົມເຊີຍ ຕໍ່ທ່ານ ກິແກ້ວ ໄຂຄຳພິທູນ ທີ່ໄດ້ຮັບຄວາມໄວ້ວາງໃຈ ຈາກພັກ, ລັດ ແລະ ປະຊາຊົນລາວ ດຳລົງຕຳແໜ່ງຮອງນາຍົກລັດຖະມົນຕີ, ພ້ອມທັງ ຊົມເຊີຍ ສປປ ລາວ ທີ່ສາມາດປະຕິບັດວຽກງານປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດ ຂອງພະຍາດໂຄວິດ-19 ໄດ້ດີ ໂດຍສະເພາະກ່ຽວກັບການຈັດຫາວັກຊີນ, ການຮັບປະ ກັນຄວາມປອດໄພໃນການເປີດການຮຽນ-ການສອນ ແລະ ອື່ນໆ. ພ້ອມກັນນີ້ ກໍຢືນຢັນ ຈະສືບຕໍ່ໃຫ້ການຊ່ວຍເຫຼືອແກ່ ສປປ ລາວ ໃນການໂຕ້ຕອບ ແລະ ຮັບມືກັບການລະບາດຂອງພະຍາດໂຄວິດ-19. ນອກຈາກນັ້ນ ກໍ່ໄດ້ລາຍງານກ່ຽວກັບແຜນງານ ແລະ ໂຄງການຮ່ວມມື ລະຫວ່າງ ສປປ ລາວ ແລະ ອົງການຢູນີເຊັບ ຈຳນວນໜຶ່ງ ໃຫ້ທ່ານຮອງນາຍົກລັດຖະມົນຕີ ໄດ້ຮັບຊາບ; ອົງການຢູນີເຊບ ກໍຈະສືບຕໍ່ເພີ່ມທະວີການພົວພັນຮ່ວມມືກັບລັດຖະບານ ສປປ ລາວ, ພ້ອມກັນນີ້ ກໍາລັງພິຈາລະນາ ແຜນງານການຮ່ວມມື ຂອງລັດຖະບານ ສປປ ລາວ ແລະ ອົງການສະຫະປະຊາຊາດ ສໍາລັບເດັກ (2022-2026)  ຊຶ່ງເປັນແຜນງານທີ່ສອດຄ່ອງ ແລະ ສະໜັບສະໜູນ ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ແລະ ຫວັງວ່າຈະໄດ້ຮັບການຈັດຕັ້ງປະຕິບັດມີຜົນສໍາເລັດດີ.​​​​
​​​

ແຫຼ່ງ: ຫ້ອງວ່າການສຳນັກງານນາຍົກລັດຖະມົນຕີ