ມອບ-ຮັບ ໜ້າທີ່ ລັດຖະມົນຕີກະຊວງແຜນການ ແລະ ການລົງທຶນ

ຜູ້ຂຽນ: ​ອາ​ນິ​ຄົມ ວົ​ງເດືອນ

ວັນຈັນ, 14 ຕ.ລ 2019 11:00

​​ໃນຕອນເຊົ້າ ຂອງວັນທີ 11 ຕຸລາ 2019 ທີ່ ກະຊວງແຜນການ ແລະ ການລົງທຶນ ໄດ້ຈັດພິທີມອບ-ຮັບໜ້າທີ່ ເລຂາຄະນະພັກ, ລັດຖະມົນຕີກະຊວງແຜນການ ແລະ ການລົງທຶນ ລະຫວ່າງ ທ່ານ ສຸພັນ ແກ້ວມີໄຊ, ກໍາມະການສູນກາງພັກ, ລັດຖະມົນຕີກະຊວງແຜນການ ແລະ ການລົງທຶນ (ຜູ້ເກົ່າ) ແລະ ທ່ານ ສອນໄຊ ສີພັນດອນ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ວ່າການລັດຖະມົນຕີກະຊວງແຜນການ ແລະ ການລົງທຶນ (ຜູ້ໃໝ່), ໂດຍການໃຫ້ກຽດເຂົ້າຮ່ວມ ແລະ ໂອ້ລົມ ຂອງທ່ານ ທອງລຸນ ສີສຸລິດ, ກໍາມະການກົມການເມືອງສູນກາງພັກ, ນາຍົກລັດຖະມົນຕີ, ມີບັນດາລັດຖະມົນຕີ, ຮອງລັດຖະມົນຕີ, ຜູ້ຕາງໜ້າຈາກຄະນະຈັດຕັ້ງສູນກາງພັກ ພ້ອມດ້ວຍ ຄະນະນໍາ ແລະ ພະນັກງານຫຼັກແຫຼ່ງ ພາຍໃນກະຊວງແຜນການ ແລະ ການລົງທຶນ ເຂົ້າຮ່ວມ.

​​​ໂອກາດດັ່ງກ່າວ, ທ່ານ ສຸພັນ ແກ້ວມີໄຊ ໄດ້ລາຍງານໃຫ້ຊາບ ກ່ຽວກັບສະພາບການນໍາພາ-ຊີ້ນໍາ ວຽກງານແຜນການ ແລະ ການລົງທຶນ ໃນໄລຍະ 4 ປີຜ່ານມາ ແລະ ບັນດາໜ້າວຽກຈຸດສຸມທີ່ຈະຕ້ອງໄດ້ສືບຕໍ່ແກ້ໄຂ ໃນຕໍ່ໜ້າ. ຈາກນັ້ນ, ທ່ານ ທອງລຸນ ສີສຸລິດ ກໍ່ໄດ້ມີຄຳເຫັນໂອ້ລົມ ໂດຍໄດ້ຍົກໃຫ້ເຫັນບົດບາດຄວາມສຳຄັນ ຂອງກະຊວງແຜນການ ແລະ ການລົງທຶນ ໃນແຕ່ລະໄລຍະ, ພ້ອມທັງສະແດງຄວາມຍ້ອງຍໍຊົມເຊີຍ ແລະ ຕີລາຄາສູງ ຕໍ່ໝາກຜົນທີ່ກະຊວງ ສາມາດຍາດມາໄດ້ ຊຶ່ງກໍ່ເປັນຜົນມາຈາກການນຳພາ-ຊີ້ນຳ ຂອງບັນດາການນຳຂອງກະຊວງແຜນການ ແລະ ການລົງທຶນ ໃນແຕ່ລະໄລຍະຜ່ານມາ. ໃນສະພາບປະຈຸບັນ ທີ່ມີທັງກາລະໂອກາດ ແລະ ສິ່ງທ້າທາຍທົດສອບຫຼາຍຢ່າງ ກໍ່ຫວັງວ່າ ທ່ານ ສອນໄຊ ສີພັນດອນ ຈະສືບຕໍ່ເສີມຂະຫຍາຍຜົນງານທີ່ດີ ແລະ ແກ້ໄຂບັນຫາຕ່າງໆ ໄດ້ດ້ວຍດີ. ພ້ອມດຽວກັນນີ້, ທ່ານ ນາຍົກລັດຖະມົນຕີ ໄດ້ຊີ້ນໍາໃຫ້ກະຊວງແຜນການ ແລະ ການລົງທຶນ ສືບຕໍ່ເອົາໃຈໃສ່ ເປັນຕົ້ນ ການວາງແຜນການຕ້ອງໃຫ້ແທດກັບຕົວຈິງ ໄປຕາມຂະບວນການພັດທະນາ ໂດຍການນໍາໃຊ້ຄວາມອາດສາມາດບົ່ມຊ້ອນ ທີ່ມີ, ໃນນັ້ນ ຕ້ອງບຸກທະລຸໃນການວາງແຜນ ຕ້ອງຮັດກຸມ, ມີການກວດກາ ແລະ ແກ້ໄຂຢ່າງເປັນລະບົບ; ເອົາໃຈໃສ່ຈັດລຽງບູລິມະສິດ ໂຄງການລົງທຶນຂອງລັດ; ຄົ້ນຄວ້າ, ວິເຄາະວິໃຈ ເພື່ອສ້າງເງື່ອນໄຂໃຫ້ປະເທດຊາດ ຫຼຸດພົ້ນອອກຈາກສະຖານະພາບປະເທດດ້ອຍພັດທະນາ; ດຶງດູດການລົງທຶນທັງຈາກພາຍໃນ ແລະ ຕ່າງປະເທດໃຫ້ຫຼາຍຂຶ້ນ ຄຽງຄູ່ກັບ ການເລືອກເຟັ້ນບໍລິສັດທີ່ດີ, ມີທຶນຮອນ ໂດຍການສ້າງເງື່ອນໄຂ ເອື້ອອໍານວຍຄວາມສະດວກດ້ານການລົງທຶນ, ແກ້ໄຂບັນດາກົນໄກຕ່າງໆໃຫ້ໂລ່ງລ່ຽນ ແລະ ໂປ່ງໃສ, ແລະ ເປັນໃຈກາງໃນການດຳເນີນການປັບປຸງຕົວຊີ້ວັດ ໃນການດຳເນີນທຸລະກິດ. ນອກນັ້ນ ໃຫ້ເອົົາໃຈໃສ່ຄຸ້ມຄອງ ແລະ ປັບປຸງ ແກ້ໄຂບັນດາເຂດເສດຖະກິດພິເສດ; ຄຸ້ມຄອງ ແລະ ນຳໃຊ້ທຶນຊ່ວຍເຫຼືອເພື່ອການພັດທະນາ ໃຫ້ເກີດປະໂຫຍດສູງສຸດ, ເອົາໃຈໃສ່ວຽກງານຮ່ວມມືກັບສາກົນ;  ເອົາໃຈໃສ່ເກັບກໍາສະຖິຕິຂໍ້ມູນຂ່າວສານໃຫ້ຖືກຕ້ອງ, ຊັດເຈນ, ຊຶ່ງຈະເຮັດໃຫ້ການວາງແຜນ ຖືກຕ້ອງກັບສະພາບຕົວຈິງ. ພະນັກງານຂະແໜງແຜນການ ແລະ ການລົງທຶນ ຕ້ອງເອົາໃຈໃສ່ພັດທະນາຕົນເອງ ແລະ ສຶກສາຄົ້ນຄວ້າຢ່າງຮອບດ້ານ ເພື່ອຈັດຕັ້ງປະຕິບັດວຽກງານ ຢ່າງມີປະສິດທິພາບ ໂດຍສະເພາະ ການດຶງດູດການລົງທຶນ ແລະ ກະຕຸ້ນເສດຖະກິດໃຫ້ມີການພັດທະນາດີຂຶ້ນ ຢ່າງບໍ່ຢຸດຢັ້ງ.  
​​ໃນຕອນທ້າຍ, ທ່ານ ສອນໄຊ ສີພັນດອນ ໄດ້ຂຶ້ນກ່າວຮັບໜ້າທີ່ ແລະ ຮັບຄໍາໂອວາດ, ຊຶ່ງທ່ານໄດ້ສະແດງຄວາມຮູ້ບຸນຄຸນ ມາຍັງສູນກາງພັກ-ລັດຖະບານ ທີ່ໄດ້ໃຫ້ຄວາມໄວ້ເນື້ອເຊື່ອໃຈ ແລະ ໄດ້ມອບໝາຍໜ້າທີ່ສໍາຄັນ ຕໍ່ວຽກງານດັ່ງກ່າວນີ້,  ພ້ອມທັງ ສະແດງຄວາມຂອບໃຈ ມາຍັງຄະນະພັກກະຊວງແຜນການ ແລະ ການລົງທຶນ, ຕະຫຼອດຮອດສະມາຊິກພັກ, ພະນັກງານທົ່ວຂະແໜງແຜນການ ແລະ ການລົງທຶນ ທີ່ໄດ້ສຸມສະຕິປັນຍາ ເຂົ້າໃນການຈັດຕັ້ງຜັນຂະຫຍາຍວຽກງານ ມີຜົນສໍາເລັດເປັນກ້າວໆມາ ແລະ ໃຫ້ຄຳໝັ້ນສັນຍາວ່າ ຈະສືບຕໍ່ຮັກສາມູນເຊື້ອອັນດີງາມ, ເຕົ້າໂຮມຄວາມສາມັກຄີ ແລະ ສຸມສະຕິປັນຍາ ເພື່ອຈັດຕັ້ງປະຕິບັດວຽກງານ ໃຫ້ສຳເລັດຕາມການມອບໝາຍ ແລະ ຕອບສະໜອງກັບຄວາມຮຽກຮ້ອງຕ້ອງການ ຂອງການພັດທະນາເສດຖະກິດ-ສັງຄົມ ໃນໄລຍະໃໝ່.

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ