ຊົມເຊີຍ 3 ພາກສ່ວນ ມອບເງິນຊ່ວຍເຫຼືອຜູ້ປະສົບໄພນໍ້າຖ້ວມ

ຜູ້ຂຽນ: ພະ​ແນກ​ໂຄ​ສະ​ນາ, ກົມ​ປະ​ຊາ​ສຳ​ພັນ

ວັນອັງຄານ, 10 ກ.ຍ 2019 15:00

​ໃນຕອນເຊົ້າ ຂອງວັນທີ 10 ກັນຍາ 2019 ທີ່ ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ໄດ້ຕາງໜ້າໃຫ້ລັດຖະບານ ຮັບເງິນຊ່ວຍເຫຼືອຜູ້ປະສົບໄພນໍ້າຖ້ວມ ຈາກກຸ່ມບໍລິສັດ ເອັສທີ ຈຳນວນ 2,5 ຕື້ກີບ, ຈາກກຸ່ມບໍລິສັດ ພົງຊັບທະວີ ຈຳກັດຜູ້ດຽວ ຈຳນວນ 2 ຕື້ກີບ ແລະ ຈາກບໍລິສັດທີ່ປຶກສາ ດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ (IHC) ຈຳນວນ 2 ຕື້ກີບ, ໂດຍມີພະນັກງານທີ່ກ່ຽວຂ້ອງ ຂອງແຕ່ລະພາກສ່ວນ ເຂົ້າຮ່ວມ.​

ການມອບເງິນໃນຄັ້ງນີ້, ຕາງໜ້າກຸ່ມບໍລິສັດ ເອັສທີ ກ່າວມອບໂດຍທ່ານ ສີທັດ ໄຊສຸລິວົງ, ປະທານກຸ່ມບໍລິສັດ ເອັສທີ; ຕາງໜ້າກຸ່ມບໍລິສັດ ພົງຊັບທະວີ ຈຳກັດຜູ້ດຽວ ກ່າວມອບໂດຍທ່ານ ພົງສະຫວັດ ເສນາພວນ, ປະທານກຸ່ມບໍລິສັດ ພົງຊັບທະວີ ຈຳກັດຜູ້ດຽວ ແລະ ຕາງໜ້າບໍລິສັດທີ່ປຶກສາ ດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ ກ່າວມອບໂດຍທ່ານ ປີຊາ ແກ້ວໄຊຍະຈັກ, ປະ ທານບໍລິສັດບໍລິສັດ ທີ່ປຶກສາ ດ້ານການລົງທຶນ ແລະ ກໍ່ສ້າງເຂື່ອນໄຟຟ້າ ຈຳກັດຜູ້ດຽວ.
                                      
ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ກ່າວຂອບໃຈ ຕໍ່ສາມພາກສ່ວນດັ່ງກ່າວ ທີ່ໄດ້ນຳເອົາເງິນມາມອບ ເພື່ອນຳໄປຊ່ວຍເຫຼືອ ຜູ້ປະສົບໄພນໍ້າຖ້ວມໃນປີນີ້ ເພື່ອບັນເທົາທຸກ ແລະ ສາມາດແກ້ໄຂບັນຫາຕ່າງໆ ທີ່ໄດ້ຮັບຜົນກະທົບ ແລະ ເສຍຫາຍຈາກໄພພິບັດນໍ້າຖ້ວມຄັ້ງນີ້ ໃຫ້ສາມາດຜ່ານພົ້ນໄປໄດ້ດ້ວຍດີ.​

ແຫຼ່ງ: ຫ້ອງວ່າການສໍານັກງານນາຍົກລັດຖະມົນຕີ